Directorate of Nature & Environment

Dia Mundial di Parha Migratorio 2023 ta celebra e importancia di awa pa e necesidad di parhanan cu ta migra di un lugar p’e otro

Dia Mundial di Parha Migratorio na Ingles ta yam’e World Migratory Bird Day ta celebra dia 14 di october bou di e tema “Awa: Sosteniendo Bida di Parha.” Awa ta fundamental pa bida riba nos planeta, y parhanan migratorio ta depende di ecosistema acuatico y/of tambe esun marino durante ciclo di nan bida. Directie Natuur en Milieu ta mira e importancia pa yuda e parhanan y na habitat y ta ‘esey ta terce e informacionan dilanti y comparti cu comunidad por ehempel kico por hasi pa yuda e parhanan migratorio pa nan sobrevivencia temporal y den largo plaso.

Damnan, areanan di saliña, den paisnan cercano tambe ta papia di areanan humedal interior y di costa, riunan grandi y otronan chikito, lagonan, pantano y laguneta tur ta vital pa e sobrevivencia di parhanan asina nan ta haya pa come, bebe of cria. E mesun luganan menciona tambe ta sirbi e parhanan por descansa pa asina nan por siqui cu mas forsa cu ta rekeri pa nan biahe largo. Algun di e parhanan cu ta migra temporal ta kies Aruba ta descansa prome cu nan ta bolbe lugar di origen of tin otron cu ta sigui despues di descansa na Aruba, pa sigui trek bai. Desafortunadamente, hopi di e ecosistema acuatico ta bou menasa rond mundo. Esaki ta haci cu tambe e habitat y e tambe parhanan migratorio tambe ta bou menasa.

E demanda humano pa awa ta aumenta mas ainda, polucion y cambio di clima ta impacta directamente e disponibilidad di awa limpi y e estado di conservacion di parhanan migratorio y nan habitat ta tema di discusion.

E dia observa pa cu parhanan migratorio ta un campaña anual di conscientizacion pa asina pone enfasis riba e necesidad pa conservacion di e sorto di parhanan aki y nan habitat. E dia di observacion ta trata na alcansa nivel global y e ta un instrumento efectivo pa yuda aumenta conscientizacion di e menasanan cu parhanan migratorio ta enfrenta, nan importancia ecologico y e necesidad pa cooperacion internacional pa haya conserva nan.

Riba e dia mundial di parhanan migratorio 2023, hende y organisacionnan rond mundo ta uni forsa pa celebra diferente parhanan migratorio y pa tuma accion pa proteha nan y nan habitat cu ta encera areanan di ecosistema acuatico y e recurso awa. Ta encurasha organisacionan y scolnan pa organisa eventonan cu ta inclui, programanan educativo y proyecto di conservacion. Na Aruba, nos tin Aruba Birdlife Conservation cu ta hasi asina hopi trabow pa conservacion di areanan destina pa entrotro parhanan pero tambe ta yuda den otro areanan y topiconan cu ta encera parhanan en general.

Individuanan tambe por envolvi riba e dia mundial obsrva aki door di siña mas di parhanan migratorio y e menasanan cu nan ta enfrenta, duna sosten na organisacionnan di conservacion di parhanan y haci cambio den vida personal manera evita di uza plastic sin cu ta necesario pa yuda proteha parhanan y nan habitat.

Kico bo por haci pa yuda e parhanan migratorio?

• Planta matanan local den bo cura di cas of hardin pa provee comida y lugar di refugio pa parhanan. Pone awa disponibel pa parha haya awa fresco pa bebe.
• Reduci bo consumo di awa pa yuda conserva e recurso di awa.
• Duna sosten na organisacionnan di conservacion cu ta trahando pa proteha parhanan na Aruba of internacional y tambe nan habitat. Tin organisacion cu ta bende tasnan reusabel na unda un parti di e ganashi ta bai pa organisacion cu ta yuda beneficio di parhanan.
• Evita di uza pesticida y herbicida den matanan of den hardin, esaki por daña calidad di bida di parhanan y nan fuente di comida.
• Educa otronan di e importancia di parhanan migratorio y e necesidad pa proteha nan y nan habitat y e recurso vital pa nan cu ta awa.

Door di tuma algun di e pasonan simpel aki, tur nos por yuda pa sigura cu parhanana migratorio ta sigui progresa pa generacionnan cu ta bin. Directie Natuur en Milieu ta aplaudi esfuersonan cu organisacion ambiental local ta hasi y tambe otronan cu ta admira parha of cu ta recata parhanan. Comparti momentonan den naturalesa y scucha e parhanan y admira nan bunitesa tambe ta un manera di conscientisa. Por saca potret di parhana y busca pa sa nan nombernan y tambe nan origen. Feliz dia Mundial di Parhanan Migratorio 2023.