Na Departamento di Naturalesa y Medio Ambiente (DNM) ta yega diferente keho. Ultimamente, a drenta varios keho relaciona cu diferente aspectonan di lama, manera nos beachnan, e flora y fauna marina, e descuido general di nos lama.
Nos ta un isla turistico, cu ariba su mes ta un factor cu ta pone hopi peso riba e areanan di costa, principalmente nos beachnan y e areanan unda ta practica deporte acuatico manera scuba y snorkel. Pa nos Arubianonan tambe e areanan di costa ta importante pa entre otro relaha, landa, practica pesca recreativo y deportenan acuatico.
Kehonan cu ta yega na DNM ta principalmente e sushedad cu tin ariba e beachnan y den awanan na nos costa, e uzo excesivo di nos recursonan marino, pero tambe e destruccion di e flora y fauna.
Potretnan cu DNM a haya ta mustra con botonan ta uza nan anker y con nan ta mara nan boto cu cadena n’e coral y botonan gezink. E botonan gezink aki por ta un atraccion turistico pa esnan cu ta bin nos isla pa snorkel, sambuya y practica e deporte di scuba/snorkel. Coralnan ta uza e structuranan aki pa cuminsa forma un rif di coral. Tambe piscanan y otro especienan ta cuminsa habita e structura y su cercania. Asina cu tempo bo ta haya un formacion di rif di coral cu ta habita pa diferente especie di bida marino.
Loke ta concerni DNM principalmente ta, e destruccion di e bida marino. Tin hende ta uza formacion di coralnan pa mara nan boto asina haciendo daño na coralnan. Hopi hende no ta tene cuenta cu e coral no ta un pida piedra. E coral ta un organismo marino bibo cu ta forma door di un colonia di especie invertebra (ongewervelde dieren). Destruccion di e naturalesa y medio ambiente marino tin su consecuencia pa nos turismo, mescos cu e destruccion di naturalesa y medio ambiente riba tera.
Prome cu enfatisa importancia di nos naturalesa y medio ambiente como producto turistico relaciona cu nos finansas y economia, nos mester corda cu su prome tarea ta pa duna y mantene bida. E ser humano ta convivi cu otro especie. Destruccion y desekilibrio den naturalesa y medio ambiente tardi of tempran tin su consecuencia pa bida en general. Ya na nivel mundial nos ta mira cambionan tumando lugar. No ta pasa un dia cu bo ta tende di e cambio climatologico cu mundo ta pasando aden, cu tur e consecuencianan cu tin y lo bay tin pa bida manera nos conoce awe.
Algun operador cu ta traha den e industria turistico, pero tambe esnan cu ta sali cu boto pa pisca of pa placer mester realisa cu na momento cu causa daño na nos naturalesa y medio ambiente no ta nan trabou/negoshi so ta na peliger, pero di hopi otro persona trahando den e industria turistico y tambe esnan cu ta traha pafor di e industria turistico.
Nos tin cu corda cu dañonan na nos flora y fauna no ta regenera asina lihe. E ta tuma su tempo y si e daño ta grandi, kisas e no ta bini bek mas.
Departamento di naturalesa y medio ambiente ta pidi tur hende cu ta traha den e industria di turismo pa proteha nan propio industria door di traha y uza e recursonan natural na un manera sostenibel. Uza e recursonan na un forma responsabel pa asina no destrui bo propio industria, pero sigur pa no destrui otro especienan. Esaki ta bay tambe pa publico en general cu ta haci uzo di nos recursonan natural. Sea ta e beachnan, e awa of si nan ta practica piscamento.
DNM kier informa cu nos lo ta hunto cu otro departamentonan controlando kico ta tumando luga den e areanan aki. Nos ta pidi abo cuidadano pa ora bo wak mal uzo y destruccion di nos recursonan, nos flora y fauna, denuncia esaki. Por haci e denuncia uzando e plataforma di infraruba.com. Tambe si bo tin sugerencianan, reaccionnan positivo cu por yuda resolve algun di e situacionnan treci dilanti, nan ta bon bini.
Por fabor yama DNM, tel. 584-1199, puntra pa Yessi of contact nos via e-mail [email protected]. Tambe por bishita nos website dnmaruba.org.
