Na comienso di luna di juni a tuma lugar na Honduras e conferencia di Cartagena Convention y su protocolnan tocante siguridad di nos costanan y bida marino pa e region di Caribe. Director di Directie Natuur en Milieu (DNM) Sr. Gisbert Boekhoudt a representa Aruba y a duna su aporte como tambe a intercambia idea pa loke ta trata e retonan di awendia relaciona cu e topico di bida marino. Durante e conferencia, gobierno di Honduras a organisa un Blue Economy Summit pa encurasha un tiki mas uzo sostenibel di e recursonan cu e oceano y lama ta brinda den e region por medio di innovacion y tecnologia.
E topiconan di discusion durante e COP15 a inclui e status di e actividadnan cu e miembronan a acorda den e conferencia 2 aña pasa. Ademas kico a establece y a aporta na e plan 2019-2020 cu ta haci un yamada pa cooperacion, participacion y accion den region Caribense relaciona cu e retonan di polucion marino y perdida di biodiversidad.
Aruba tambe a forma parti den e reunion di e protocol di polucion di actividadnan cu ta origina for di actividadnan y fuentenan riba tera, e asina yama LBS (Land-Based Sources and Activities )of Pollution Protocol. Den e reunionnan aki a dirigi e atencion riba e retonan di polucion di awa preto/grijs (sewage water), e status di e prohibicion di saconan di plastic y e styrofoam ban den region di Caribe. Asina a bini cu e prome rapport di e estado/nivel di polucion marino den region Caribense.
Fuera di e COP15, a tuma lugar tambe e di 10 reunion di ‘Protocol Specially Protected Areas and Wildlife’ (SPAW). Durante e reunion a enfatisa e importancia pa conserva rifnan di coral, maneho di areanan cu tin mondi di mata di mangel. Tambe a trata e topico di acidificacion di oceano y lama den e areanan marino protegi (MPA’s). Pa por realisa e Metanan di Desaroyo Sostenibel (SDG’s) ta importante pa proteha e especienan special cu ta habita den e areanan menciona.
Loke tambe a bin den discusion tawata e fenomeno di sargassum cu nos a bin ta experiencia na Aruba y den region como cu el a bira un di e retonan di naturalesa.
DNM a aporta grandemente na e reunion cu a tuma luga na Roatan, Honduras durante e di 15 ‘Conference of Parties’ (COP15) pa e Cartagena Convention. Temanan cu sigur nos mester ta consciente di dje ora cu ta trata di conserva y proteha nos bida marino.
