Departamento di Naturalesa y Medio Ambiente, tambe conoci bou di e abreviacion DNM, kier a participa na pueblo cu nan departamento awor ta ricibi keho tambe via e sistema InfrAruba. DNM tin un centralista cu ta atende keho via InfrAruba, como tambe via telefoon, carta of personalmente. E meta ta pa den futuro pueblo haci mas uzo di InfrAruba pa entrega nan kehonan. Esaki ta pa por tin un mihor coordinacion entre e departamentonan/Servicio pa atende e kehonan ricibi.
Hopi biaha un keho mester di atencion di diferente departamento/servicio pa por keda resolvi. InfrAruba no ta djis un site unda bo ta laga bo keho atras, pero ademas infrAruba ta keda dunabo informacion tocante tratamento di bo keho. Si ta necesario y cu bo permiso nan ta tuma contacto cu bo p’asina intercambia mas tocante bo keho. InfrAruba ta haci posibel cu un departamento/servicio por pasa e keho pa un otro departamento/servicio on line, reduciendo asina e tempo cu ta tuma pa bo keho bay di un departamento pa otro.
InfrAruba ta crea e oportunidad pa departamento y e servicionan intercambia opinion y traha hunto pa resolve e problema rapidamente. Tambe e ta haci posibel cu for di un lugar central por monitor si ta trahando riba e kehonan p’asina evita cu kehonan ta keda montona. Aspectonan cu mester tene na cuenta ora di entrega keho na Departamento di Naturalesa y Medio Ambiente (DNM)
Inspectie DNM ta traha a base di leynan cu ta concerni nos naturalesa y medio ambiente, cu ta Ley pa Proteccion di Naturalesa (Natuurbeschermingsverordening) Decretonan nacional (Landsbesluiten), Ley di Molester (Hinderverordening), Decreto di Molester (Hinderbesluit) y algun articulo di Ley di Polis (Algemene Politieverordening) relaciona cu asunto di medio ambiente. Entre otro, inspectornan di DNM ta tene control riba y ta monitor e dumpnan ilegal, como tambe lama, dam y tankinan. Banda di ta monitor, e inspectornan ta atende e kehonan/melding segun cu nan drenta. Pa por atende e kehonan debidamente mester duna descripcion di e keho y adres/ localidad di unda e hecho cu ta duna keho di dje ta tuma lugar. Si e lugar no tin un adres/number, por indica y splica unda e lugar ta situa pa asina por haya e lugar. Esaki por tambe door di ubicacion. Semper ta bon pa e persona laga su number y nomber atras pa si mester di mas informacion. Nos no ta divulga e nomber si e persona cu ta entrega keho no kier. Si ta desea di keda anonimo nos ta respeta esey, pero tene na cuenta cu esey por haci buscamento di mas informacion cerca e persona cu a entrega e keho dificil.
Adhunto algun ehempel di kehonan:
•Keho di sushi cu ta bay lama for di tereno di un negoshi of di su bari di sushi.
•Keho di negoshi cu ta ocasiona molester: garashi di auto, luga di spuit y di saca sla di auto (bodyshop), contratista, tur negoshi cu por causa molester pa bisiña den forma di holo y sonido. Esakinan mester tin hindervergunning pa por opera. Aki por ta cu nan no tin hindervergunning, pero tambe por ta cu nan no ta tene nan mes na e rekisitonan pa por tin e vergunning.
•Keho di actonan contra naturalesa, mata protegi y bestia protegi.
•Keho di mancha di azeta (oilspill) di WEB of Citgo of di un barco of boto (kehonan riba awa ta ser haci conhuntamente cu Kustwacht of Maritiem polis), of cu ta yega aki di otro isla of pais den region.
•Keho di dump ilegal na negoshi cu ta coba santo anto despues tira sushi den e buraco. Ora ta trata di sushi benta aki aya den mondi ta kehonan cu ta ser atendi door di Bureau City Inspector.
•Keho di asbest. Asbest ora cu hende ta kita/move/transporta esaki. DNM ta controla pa e asbest yega asbest cell na Parkietenbos. Tambe si bo nota cu hende ta benta asbest un caminda of bo wak asbest benta un caminda bo por avisa DNM via infrAruba. Ora kier kita/baha dak di asbest mester tuma contacto cu Dienst Technische Inspectie (DTI) cu ta informa bo di e procedura y ta inicia e procedura cu ta necesario.
•Keho di awa di pos.
Inspectie DNM ta atende cu e casonan cu ta concerni negoshi y Bureau City Inspector ta atende e casonan di cas. Keho di sushi di laboratorio (of otro sushi medico). Esaki ta pa Directie Volksgezondheid (DVG). Solamente inspectie por actua si ta intencionalmente e servicio di piki sushi a tira nan afo.
Rosamento di tereno no ta prohibi, pero si mester tene cuenta cu e Decreto Nacional pa proteccion di flora y fauna local (Lb bescherming inheemse flora en fauna), pa loke ta trata e especienan protegi pa e decreto nacional aki cu ta entre otro shoco, cadushi y e mangelnan. Mester di un dispensacion (ontheffing) pa hala e sortonan cu ta protegi for di e tereno, pa esaki bo por yama DNM y nan ta dunabo e informacion necesario. Si bo tin duda kico por tin riba bo tereno y cu por ta riba e lista di flora y fauna protegi cu hopi gusto e Seccion di Inspeccion conhuntamente cu Seccion di Investigacion lo bin tira un bista y informabo si tin algo cu ta inclui den e decreto menciona riba bo tereno.
Abo tambe por tuma accion y contribui na Aruba su naturalesa y medio ambiente. Door di raporta daño, maluzo, destruccion, crimen contra nos flora, fauna y medio ambiente bo ta yuda den conservacion/preservacion di locual ta di nos. Conservacion di nos naturalesa y medio ambiente ta un responsabilidad cu nos tur tin di carga.
Mescos ta e deber di un gobierno pa entre otro implementa leynan necesario, e cooperacion activo di comunidad tambe ta hunga un rol pa locual ta e desaroyo continuo di un pais. Hunto nos por haci hopi pa nos isla y asina tambe keda motiva otro pa crea un Aruba mas sano, limpi y sostenibel.
Subi riba e website di infrAruba y entrega bo keho y nos lo ta contento di por atende bo. Via infrAruba bo por entrega keho na diferente otro departamentonan di gobierno tambe.
Si bo tin un keho contact nos via e plataforma InfrAruba, tambe via telefoon DNM, tel. 584-1199 of 191, puntra pa Yessy. Nos adres ta Bernardstraat 75, San Nicolas.
