E prome Dia Internacional di Mama Tera tawata na 1970. No a stipula e fecha di 22 di april pa e keda na un dia celebra so, sino pa e bira un movemento pa e medio ambiente. Awe ta recorda cu 51 aña pasa a marca dia special aki pa inspira conscientisacion, proteccion y aprecio pa mundo su naturalesa y medio ambiente. Directie Natuur en Milieu (DNM) kier a uni na e movemento aki y asina yuda cu conscientisacion riba diferente tema.
E organisacion Earthday.org ta e organisacion mundial mas grandi pa cu e movemento pa nos medio ambiente. E mision di e organisacion aki ta pa diversifica, educa, y activa mundialmente, trahando cu mas di 750,000 partner den 192 pais pa crea democracia medio ambiental. Ta referi na e actividad rond di e dia aki como e actividad civico mas grandi na unda 1 biyon di hende ta participa anualmente. E aña aki ta e di dos biaha cu ta organis’e na un forma virtual unda cu lo tin 3 dia di eventonan virtual. Riba dia 20 a cuminsa cu e activistanan hoben manera Gretha Thunberg cu mensahenan pa humanidad, tambe tawata tin un evento di e organisacion HIPHOPcaucus. Riba dia 21 lo tin riba e plataforma diferente actividad pa educadornan riba temanan di medio ambiente. Riba dia 22 mes lo tin e evento digital unda lo tin workshopnan, discusionnan di panelistanan y presentacionnan special cu ta enfoca riba e tema pa e aña aki Restore Our Earth™. Lo amplia e tema pa trata diferente topico manera: tecnologia pa restaura clima, esfuersonan pa planta palo y matanan den e.o. mondinan y hunglanan, agricultura regenerativo, husticia pa igualdad y medio ambiente como tambe ciencia humano. E aña aki tambe e actividadnan di Earthday ta bay paralel cu e Global Climate Summit di Merca di e ‘Biden administration.’ Esaki tambe ta un paso prometedor mundialmente pa reunion global pa cu e esfuersonan pa nos medio ambiente. Earth Day 2021 lo ta Live y lo stream tur actividad riba e plataforma: https://www.earthday.org/earth-day-2021/
Kico ABO por haci pa dia di MamaTera? Join e movemento. Subi algun website informa bo mes kico ta e temanan di importancia, comparti esakinan riba rednan social cu otronan. Haci contacto cu esnan cu ta profila nan mes den e tereno aki y debati riba situacion medio ambiente local, reuza materialnan, haci un compromiso pa reduci e uzo di energia y mas importante ta duna bo contribucion na planta un mata y cuid’e. Siña nos muchanan stima y respeta nos medio ambiente y nos naturalesa. Si cada persona haci algo chikito esaki lo yuda pa e lidernan local of mundial tuma decisionnan importante pa yuda nos planeta.
Historia di dia di MamaTera: E idea di dia di Mama Tera tawata iniciativa di senador di Merca pa Wisconsin, Sr. Gaylord Nelson, cu na 1970 despues di tawata testigo di un oil spil grandi na California como tambe inspira pa e movemento anti-guera, a realisa cu su persona hunto cu conscientisacion publico di efectonan di polucion di aire, awa y tera lo por yuda pone e tema di proteccion di medio ambiente riba e agenda politico. E prome Earth Day a yuda na introducion di United States Environmental Protection Agency (US EPA) y a logra di tin leynan pa aire limpi, awa limpi y bestianan protegi.
DNM ta invita un y tur pa join den e movemento y check e website di earthday.org pa actividadnan creativo y kico tur abo por haci na cas pa yuda restaura e Mama Tera y haci un diferencia e Dia di Mama Tera aki.
