Diaranson dia 3 di maart, 2021 a observa Dia Mundial di Bestia y Matanan Salvahe. Durante e di 68 asamblea general di Nacionnan Uni (UNGA), a proclama esaki riba 3 di maart 2013. E fecha aki ta e aniversario di firmamento di e convenio internacional cu ta regla traficacion internacional di especienan di flora y fauna cu ta bou menasa of ta den peliger, conoci como ‘Convention International Trade in Endangered Species of Wild Fauna and Flora (CITES).’
Na Aruba tambe nos ta haci uzo di e acuerdonan conforme e convenio internacional aki pa brinda proteccion na nos flora y fauna. E autoridad Veterinaire dienst ta e departamento cu ta maneha tur aspecto cu ta trata declaracion di e especienan cu ta protegi pa CITES. Directie Natuur en Milieu (DNM) na 2016, conhuntamente cu otro departamentonan concerni cu medio ambiente a amplifica e ley Natuurbeschermingsverordening (AB 1995 no 2). E amplificacion cu ta elabora riba e contenido di e verordening ey, ta e Landsbesluit bescherming inheemse flora en fauna (AB 2017 no 48) cu ta contene e lista di e especienan protegi internacionalmente y localmente, como tambe ta inclui esunnan cu ta endemico.
E tema di e celebracion internacional pa 2021 ta “Mondinan grandi cera y con nan ta provee pa e pan di cada dia: Sosteniendo hende y e planeta.”Na Ingles: “Forests and Livelihoods, sustaining people and planet.” E tema ta pone enfasis riba e rol di e areanan di mondi grandi y cera y e servicionan cu e ecosistema ta brinda pa sostenibilidad y convivencia di miyones di hende globalmente. Na Aruba nos no ta papia di e areanan di unda tin hopi mata berde cu a crece cera, pero si nos por trece mas den luz e topico di nos mondinan. Particularmente e tema scogi internacionalmente cu ta trata e comunidadnan indigena y esunnan local cu tin lasonan historico cu e areanan di vegetacion abundante y e bida salvahe di e bestianan y matanan di e area. Asina por mira con Nacionnan Uni ta alinea e topico scogi cu e compromiso pa loke ta trata e metanan di desaroyo sostenibel (SDG) number 1, 12, 13, 14 y 15. Esakinan ta SDG#1; caba cu pobresa, SDG #12; promove uzo sostenibel di recursonan, SDG13 cambio di clima y SDG #14 y #15 cu ta promove conservacion y maneho sostenibel di bida marino (SDG14) y riba tera (SDG 15).
E convivencia aki ta necesario pa cubri cierto aspectonan basico pa humanidad manera cuminda, proteccion, energia y medicina pa salud. E sobrevivencia di e areanan cu tin un vegetacion cera y nan especienan ta depende di e convivencia menciona. P’esey nos mester siña biba den harmonia cu naturalesa y no destrui pa despues lamenta.
Actualmente, por mira cu tin varios crisis andando pareu riba nos planeta, manera: cambio di clima, perdida di biodiversidad, tambe impactonan economico, social y di salubridad cu e pandemia a trece cune. E yamada mundial ta pa e modelonan di maneho tambe inclui bienestar di hende y conservacion di areanan di mondinan grandi cera, su especienan, como tambe e ecosistema cu ta sostene nan. Manehonan cu ta inclui e balor di e practicanan tradicional y conocemento cu ta contribui na establece un relacion duradero cu e recursonan di e sistema natural.
Directie Natuur en Milieu, departamento encarga cu maneho di naturalesa y medio ambiente pa Aruba kier uni n’e esfuersonan aki. DNM tambe ta traha na bienestar di nos comunidad door di proteha nos mondinan, bestia y matanan local. Hopi di esakinan ya ta protegi pa CITES y nos leynan local y nos di DNM mester trece esakinan dilanti pa por engrandece conocemento general y e importancia di esaki pa nos herencia.
