Colegio San Antonio a invita Directie Natuur en Milieu (DNM) y Stimaruba pa duna nan un excursion educativo den naturalesa.
En conexion cu e scol su dia di ‘kindness’ nan a escohe pa ta amabel cu naturalesa. E bishita a encera e importancia di area di Spaans Lagoen y e historia di Franse Pas.
Un mainta yena cu informacion historico-cultural di parti Stimaruba a yuda na engrandece e conocemento di e grupo di hoben. Mas cu claro, e parti di e importancia di proteccion di nos flora y fauna no a keda afor di parti Directie Natuur en Milieu.
Entre e dos organisacionnan a splica cu e area di Spaans Lagoen ta uno protehi y ta bou maneho di parke National Arikok. DNM a repasa e regalanan vigente di e area prome cu a sigui cu e excursion. A elabora riba e diferente matanan di mangel cu tin den e area, esta e mangel preto, mangel tam y e mangel shimaron. E grupo por a observa den e area e siguiente fauna: cododo, lagadishi cangrew, cocolishi calacuna, soldachi, warawara, cantidad di egrets, bleenchi y parhanan di misa. Hobenan a keda sorprendi di e balor y importancia di proteccion di nos areanan costal cu matanan di mangel y nan servicionan.
Na final di excursion DNM a haci e peticion na nos hobenan pa stima locual ta di nos y door di anda na un manera responsabel cu nos naturalesa y medio ambiente nos ta garantisa cu esaki ta keda den un estado saludabel pa generacionan cu ta sigui. Stimaruba a gradici muchanan di Colegio San Antonio klas 1 pa nan atencion asina concentra y nan entusiasmo pa siña di nos medio ambiente.
