Directie Natuur en Milieu (DNM) a participa virtualmente na e World Ocean Summit 2021, organisa pa ‘The Economist Group Initiative’.
E cumbre a tuma luga di 1 pa 5 di maart 2021. E topico primordial tawata Acelerando Economia Sostenibel di nos oceano. E participantenan na e cumbre a consisti di e.o. sector priva, ngo, sector publico entre nan expertonan di lama, formuladornan di maneho, lidernan di negoshi multinacional, y specialistanan di e industria cu tin di haber cu lama di diferente parti di mundo.
E cumbre mes a consisti di mas cu 60 sesion dedica na tur locual ta trata nos economia blauw (Blue economy), esta nos oceano, nos lama. Mas di 100 pais a participa di cual 150 orador, tambe riba 5000 participante cu por a haci preguntanan y participa den encuestanan durante e sesionnan. E cumbre tawata tin sesionnan general pa splica e retonan cu tin y otro 6 sesion di topiconan specifico cu tawata mas enfoca riba e industrianan of retonan cu nos oceano ta enfrenta awendia. E topiconan industrial specifico a consisti di turismo, aquaculture, energia, pesca, carga of transportacion riba lama, y plastico.
E cumbre organisa pa ‘The Economist Group Initiative’ tin e vision di un oceano cu condicion saludabel cu un economia blauw cu ta vital. Henter aña e grupo aki ta encurasha combersacionnan na nivel global concentrando riba e retonan grandi cu nos oceano ta enfrenta. Asina inspirando maneranan nobo di pensa, maneranan nobo di colabora, y accionnan mas efectivo pa carga un economia cu ta sostene e oceano.
Pronto DNM lo organisa sesionnan similar pa Aruba y asina formula un maneho completo pa nos recurso blauw, nos lama. Pasobra nos lama ta forma parti di e circulo di nos ecosistema riba tera. Organisacionnan y otro industrianan lo forma parti di e sesionnan cu lo discuti e temanan similar, pero na nivel local.
Aruba ta un isla cu ta depende di lama pa su economia por sigui draai. Pa e motibo ey nos no por bira lomba pa e economia blauw tampoco. Aruba ta depende di turismo como unico pilar economico.
Nos carganan ta yega via barco. Pesca ta forma parti di nos cultura y tin hende ta depende di esaki como nan fuente di entrada.
E problematica di plastic como sushedad ta presente y afectando nos medio ambiente. Nos mester explora energia alternativo y innovativo. DNM a wak e necesidad di ta envolvi den e cumbre aki, anticipando e formulacion di un maneho pa nos lama y basa riba sesionnan cu e usuarionan di nos recurso natural, nos lama.
DNM ta compronde cu den e situacion cu nos ta bibando no por reuni na e forma tradicional mas. P’esey ta pidi colaboracion di parti di tur NGO y otro organisacionnan, pa ora nos manda e invitacion na e multistakeholder meeting, nan atende. P’asina nos maneho ta mas completo y inclusivo posibel.
