Dia 28 di juni 2018, Directie Natuur en Milieu(DNM) a presenta e plan di maneho pa Aruba su naturalesa y medio ambiente pa gobernacion di 2018-2021. E trayectoria pa yega na e plan di maneho tabata uno largo pero cu hopi aporte importante.
Desde aña 2014, DNM ta organisa tayernan y seminario cu diferente departamento gubernamental y organisacion no-gubernamental. Door di e encuentronan aki a logra na un manera structura door di votamento, aloca cifra pa diferente tema. Di e manera aki a saca afo e urgencia cu cual nos mester atende cu e categoria/grupo ey di nos naturalesa y medio ambiente.
Despues na 2015, DNM a sigui cu encuentronan mas intensivo. Nos a uza e cuatro temanan, cu door di votamento a acumula mas punto asina poniendo nan den e categoria di prioridad. Di e manera ey e siguiente 4 temanan: Sushedad, Habitat y Sortonan, Awa, y Salud y Medio ambiente a bira esnan cu mester di mas prioridad. Ademas, pa e plan di maneho nos a inclui e tema: Cambio di Clima. E tema aki ta uno di sumo importancia mundialmente y mester haya su debido atencion na Aruba tambe.
Na luna di mei y juni a organisa diferente encuentro cu varios organisacion y a haci algun ehercicio, unda cu a haci un SWOT analysis. E ehericio di SWOT (Strength, Weaknesses, Opportunities and Threats) ta pa yuda nos yega na identifica nos puntonan fuerte, nos puntonan debil/vulnerabel, unda tin oportunidad pa desaroya/expande etc, tambe ki menasanan/retonan tin relaciona cu nos medio ambiente. Den e plan di maneho tin e lista di esnan cu tabata envolvi den e realisacion di e listanan di accion.
A mantene e sistema di analisa aki pa cada tema. Tuma por ehempel e tema di Sushedad. Ora a analisa esaki a resulta cu mester modernisa e leynan cu ta concerni sushedad. Den e caso aki DNM ta esun cu mester tuma e rienda den su man pa propone e cambionan y traha hunto cu DWJZ riba e diferente ordenansanan cu mester revisa y actualisa manera: Afvalverordening, Hinderverordening y Zandverordening.
Ademas di a establece e cuatro (4) temanan, a traduci cada tema den un meta pa yega na un desaroyo sostenibel. A haci esaki di acuerdo cu e proposicion di Nacionnan Uni. E metanan pa yega na un desaroyo sostenibel ta den total 17 metanan. Esaki nan ta referi n’e como SDG, Sustainable Development Goals. Pa mas informacion di e metanan aki por bishita e website: sdgaruba.com.
DNM ta splica na un forma detaya e diferente plannan di accion inclui den e plan di maneho di Naturalesa y Medio Ambiente. Tin oportunidad di lesa e documento aki den su totalidad ariba e website di DNM: dnmaruba.org. Click ariba e menu button “Topics” y e plan di maneho ta inclui eynan. Ta recomenda pa download e documento aki ariba bo desktop of tablet, pero NO print esaki como cu nos kier yuda cuida nos medio ambiente. Uzo di papel y ink innecesario no ta un accion sostenibel.
