Den luna di maart, Directie Natuur en Milieu, Departamento di Naturaleza y Medio Ambiente (DNM) a haya bishita di e team di Stichting Scubblebubbles cu a duna un presentacion di nan proposicion pa un di dos criadero di coral na Aruba.
Presidente di e board, Nichole Danser, conhuntamente cu Valerie van der Veldt, Isabel Bangma y Santiago Gonzalez Mora, a reuni cu Departamento di Naturaleza y Medio Ambiente pa splica con nan stichting ta trahando pa realisa e di dos criaderodi coral. Tambe nan a conta di e trabounan cu nan ehecutando pa por forma parti di un equipo di investigadornan (researchers) internacional. Di e manera ey crea un plataforma mas amplio pa expande nan conocemento ariba e topico.
E grupo di Scubblebubbles ta consisti di 33 boluntario di cual 27 ta certifica PADI openwater y otro 6 boluntario cu ta concentra ariba otro proyectonan manera esun di Pitchtime di Cedearuba. Hopi di e boluntarionan ta studiantenan di scolnan secundario di Maria College, de Schakel College y International School of Aruba.
Scubblebubbles su proposito ta pa yuda cuida y desaroya areanan cu coral tipo Staghorn Coral (Acorpora Cervicornis), den areanan caminda tin menos actividad humano pa asina e sorto di coral aki por crece y forma criadero di coralnan saludabel. Locual e grupo di boluntario di Stichting Scubblebbles ta bay haci ta, uza pidanan chiquito di coral (colonianan), cultiva y cria nan den un area cu tin cierto condicionan pa e coral por crece bon. Asina cu e coral cuminsa bira grandi y fuerte suficiente, lo transplanta of realoca nan pa un sitio di origen cu ta un area di 10 pa 15 meter hundo. E localidad aki lo ta uno cu e condicionnan necesario pa e sorto di coral aki. Den e area aki tampoco lo tin actividad humano pero mas importante e mester ta un area protehi y facil pa tene bista riba nan.
E team di boluntario di Scubblebubbles lo monitor y evalua e condicionnan di e criadero di coral. E team lo bay na e sitio di criadero tur siman pa haci mantencion di e coralnan. Entre otro, haci nan limpi contra alga y firecorals cu por bay crece y stroba e coral Staghorn. Tambe lo monitorea nan crecemento y desaroyo. Un bes cu e realocacion tuma lugar e voluntarionan lo sigui monitorea e condicion y salud di e coralnan, teneniendo na cuenta e cantidad di pisca rond di e area di coral. Scubblebubbles tambe ta forma parti di Project AWARE di PADI internacional.
Departamento di Naturaleza y Medio Ambiente a keda impreciona pa e initiativanan di Scubblebubbles y a felicita nan cu e exito di e prome criadero y ta apoya nan esfuerzo pa e di dos criadero di coral. E initiativanan aki tambe ta aporta na e metanan mundial pa un desaroyo sostenibel. Ta trata aki di SDG #14 – Bida bou awa, cu ta pa conserva y uza oceano, lama y e fuentenan marino na un manera responsabel y sostenibel.
Foto courtesia di Nichole Danser
