Via InfrAruba, e meldpunt nobo pa kehonan referente si den bo opinion bo a topa cu algo robes den nos infrastructura, nos di Inspection di Departamento Naturalesa y Medio ambiente a ricibi un keho. E keho tawata ariba un propaganda cu ta wordo publica pa un compania local di pest control encuanto nos Pega Pega. Ta asina cu ta menciona den e propaganda cu e pest control por yudabo caba cu e pega peganan door di spuit na bo cas.
Departamento di Naturalesa y Medio ambiente (DNM) kier informa y recorda tur hende cu na Aruba ta existi un lista di especienan protegi pa ley. Entre esnan protegi tin tambe nos Pega Pega. Abase di Artikel 4, tweede lid, di Natuurbeschermingverordening (AB 1995 no 2), y artikel 2 onderdeel b., no.7. di e Landsbesluit bescherming inheemse flora en fauna; e Sorto: Phyllodactylus Julieni (PegaPega/ House Gecko) ta un especie protegi.
Pa e motibo aki, nos ta urgi e compania en question y tur demas companianan, como tambe pueblo en general pa tene cuenta cu esaki. Incumplimento cu e ley aki tin su consecuencianan.
E Pega Pega ta habita areanan unda frequentemente tin insectonan. Ta conoci cu unda tin Pega Pega, no tin Cacalaca ta biba. E Pega Pega ta come e.o. Cacalaca y tambe ta mantene su area di biba liber di otro insectonan indesea. E Pega Pega ta un bestia inofensivo. E molester mas grandi ta e zonido cu e ta hasi. Poco biaha e ta hasi su mes visible den cas ya cu e ta mantene su mes hopi biaha den plafon, tras di cashi y otro hoekinan scur den cas.
Pa evita cu insecto y pega pega por drenta paden di bo cas, bo por hasi uzo di screen/gaas na bo bentananan y/of mantene nan sera.
Si Pega Pega drenta bo cas busca manera di sakele bibo door di guie cu un basora pa e porta of bentana, no dal e mata. Rond di bo cas e por come insectonan y evita cu esakinan ta bin paden.
Bishita nos website www.dnmaruba.org y conoce mas di nos departamento y e cuido di nos flora y fauna. Tambe bo por bishita www.overheid.aw una bes bo drenta den e website aki busca “beschermde planten en dieren” y lo bo haya e lista completo di flora y fauna protegi.
Departamento di Naturalesa y Medio-ambiente (DNM) ta revisa e lista di companianan di pest control. Esaki ta necesario pa nos por comunica cu companianan di pest controlnan pa un bon communicacion. Si bo ta donjo of ta maneha un pestcontrol y no a wordo contacta ainda, porfavor llama nos na DNM, tel. 584-1199, puntra pa Yessi y e lo tuma e informacion di bo compania. Tambe bo por manda informacion di bo compania na: [email protected].
