Riba 16 di juni, ta celebra dia mundial di Turtuga di lama. Directie Natuur en Milieu ta tuma un rato awe pa dirigi nan atencion riba e bestia di lama aki y trece dilanti e retonan cu nan ta enfrenta pa sobrevivi. Ta trata di e problematica di plastic. E ta un topico di sumo importancia considerando cu e ta e motibo principal di morto di e turtuga di lama. Plastic ta e causante di hopi problema den e bida marino en general.
Ta calcula cu si mundo continua cu e consumo excesivo di plastic, aki 30 aña lo tin mas plastic den lama cu pisca. Cu esey tambe e bunita turtuganan di lama lo disparce na gran cantidad. Nos tur a yega di wak videonan riba medianan social cu a haci un impacto grandi riba nos sentimentonan. Ainda nos ta corda con a haya un turtuga cu un pijp (straw) pega den su nanishi. Esaki no solamente mester a impacta nos sentimento, pero tambe mester a pone nos tuma pasonan pa trece e cambionan necesario pa stop cu uzo di productonan di plastic; productonan desechabel.
Den cuadro di e Dia di Turtuga, DNM kier pone un luz special riba e 6 especie di turtuga di lama cu ta bishita nos lama den Caribe y cu algun di nan ta bin pone webo riba nos beachnan. Ta trata di e especienan protegi pa leynan local. Nan ta: caret (Eretmochelys imbricata), cawama (Caretta caretta), tortuga blanco (Chelonian mydas), driekiel (Dermochelys coriacea), Kemp’s Ridley (Lepidochelys kempii) y e Olive Green turtle (Lepidochelys olivacea).
Tur e 6 sortonan aki ta aparece riba e lista di ley di protecion inheemse flora en fauna.
Nos ta presenta algun caracteristico di nos turtuganan:
- Turtuga NO tin djente y nan kaak ta traha di e mesun componente cu huña (keratin. Esaki ta fit riba e schedul mescos cu djente falso.
- Ta calcula cu no mas cu 1 den 1000 webo di Turtuga di lama lo sobrevivi y yega na bira un adulto.
- Turtuganan tin un afinacion pa cuminda cu e color cora, oranje y geel. Esaki ta haci cu nan ta bira curioso y ta cuminsa investiga cuminda di e colornan ey. P’e motibo ey, nan ta core peliger ora di bay explora y topa cu plastic en bes di cuminda.
- Turtuganan femenino ta bolbe bek na e mesun beach na unda nan a nace. Nan ta masha sensitivo y tin un abilidad increibel di nabega distancianan masha largo. E distancia mas grandi cu a yega di registra di un driekiel femenino ta 13,000 miya pa 647 dia. El a landa for di Indonesia pa West Coast di Merca.
Awe riba nan dia, ban nos tur contribui y haci un pida beach limpi. Haci’e liber di plastic. E organisacion TurtugAruba ta haci un trabou magnifico. No solamente e conscientisacion di e especienan aki sino tambe accionnan di limpiesa di beachnan prome cu e temporada cu nan ta bin pone webo. DNM ta invita cada un di nos pa bira mas activo den nos comunidad. Bira un boluntario tambe di e organisacion aki p’asina bo tambe yuda conserva y proteha e turtuganan cu ta bini Aruba. Felis Dia Mundial di Tortuganan di lama.
