Den e ultimo lunanan Departamento di Naturalesa y Medio Ambiente (DNM) conhuntamente cu Ministerio di Desaroyo Teritorial, Infastructura y Medio Ambiente a dialoga ariba ubicacion di oficinanan di DNM ya cu e localidad actual no ta acomoda e fluho di trabou, y e crecemento dinamico den responsabilidad di DNM.
E ta un honor pa DNM ubica su mes na unda antes tawata Uncle Louis Store. E localidad maneha pa Stichting Monumentenfonds ( SMFA) tin su beneficionan. SMFA como propietario di edificio lo percura pa restaura e monumento debidamente, pero tambe ta garantisa un mantencion apropia p’e edificio door di crea un plan di mantencion cu e mesun structura cu ta implementa na e otro monumentonan cu ta propiedad di SMFA. Asina nan ta garantisa cu e propiedad ta keda den bon condicion. Nos departamento ta na fabor di preservacion di nos herencia cultural tangibel y tambe intangibel.
Den cuadro di inovacion, DNM a haci algun peticion pa cu e structura parti paden, unda DNM lo favorece e concepto di oficina habri “open space offices”. A reuni cu staff di DNM pa presenta e concepto y a duna e staff tempo pa analis’e pa despues bay bek n’e arkitecto cu tur sugeriencia pa wak kico por y kico no.
DNM ta contento cu Monumenten fonds a tene cuenta cu locual DNM ta para p’e, pa loke ta trata aspectonan duradero manera: solar panels, water catchment system, LED lights, green wall y inverters. Si tur cos bay segun plan, DNM lo ta ubica den su localidad nobo na aña 2020. Mientrastanto, nos lo sigui duna servicio for di Bernhardstraat 75, Sanicolas.
