Directorate of Nature & Environment

Celebra Dia di Cero Desperdicio 2024: Hunto nos por reduci desperdicio

Dia 30 di maart ta Dia Internacional ro Desperdicio (Zero Waste Day). E dia aki ta dedica na eleva conscientisacion riba consumo y produccion responsabel y tambe na reduccion di desperdicio. Directie Natuur en Medio Ambiente (DNM) ta invita comunidad pa join nos den celebracion di e dia importante aki. Esaki ta e di dos biaha cu Nacionnan Uni (UN) ta observa e dia aki como cu ta na 2022 a tuma e decision pa e dia aki ta un dia observa internacionalmente.

E tema pa Dia di Cero Desperdicio 2024 ta pone enfasis riba e necesidad pa reenforsa maneho global y e importancia di practicanan di produccion y consumo sostenibel. Desperdicio y polucion di sushedad ta interumpi e ecosistemanan valioso. Tambe, e ta forma un menasa pa bienestar general di humanidad. Pa ultimo desperdicio por stanca crecemento economico di un pais,  region of nacion.

Na Aruba, nos tin un reto grandi pa enfrenta encuanto e maneho di desperdicio solido. Pero e desperdicio no ta keda solamente na locual hende ta deshaci di dje cu ta di material no biologico, pero e por inclui tambe desperdicio di cuminda. Pues ta importante pa e ser humano cambia su actitud y conducta con ta anda cu desperdicio asina ta evita cu ta deposita desperdicio unda no ta stipula p’e.

Despues cu a cera e stortplaats Parkietenbos, Aruba tin cu custuma cu tin diferente canalnan/ lugarnan, instancianan y negoshinan, cu ta procesa desperdicio cu despues ta haya un utilidad nobo. Mayoria di e lugarnan aki tin un gasto pa deposita e desperdicio. Pero tin otronan cu ta tuma desperdicio ainda gratis.  E proceso aki ta locual ta aporta na un economia circular.

Con ta por contribui na un Aruba mas limpi?

• Planea bo compras: traha un lista di compra y cumpra solamente loke bo mester, cu menos empake posibel.
• Reduci consumo: Evita uza productonan cu empaketamento innecesario. Scoge productonan cu por re-usa of recicla.
• Come consciente: Planea bo cuminda, conserva loke ta resta di cuminda pa otro dia.
• Composta desperdicio di cuminda: Composta desperdicio organico pa crea bon gordura pa bo matanan.
• Recicla: Separa bo desperdicio pa recicla segun e instruccionnan di recoleccion.
• Reuza: Duna un otro funcion na obhetonan di tur dia. Evita tira nan afo sin considera otro proposito.

Hunto nos por logra un Aruba mas sostenibel!

E meta di un desaroyo sostenibel cu ta directamente asocia y relevante na cero desperdicio ta meta number 12. Pero e no ta keda limita na #12 so, e otro metanan relaciona na topico di Cero Desperdicio ta e metanan SDG# 6, SDG#11, SDG# 13.

DNM ta comprometi na yuda Aruba alcansa un futuro sin desperdicio y un mihor maneho di e desperdicio cu ta na beneficio di tur. Pa mas informacion riba Dia Internacional di Cero Desperdicio por bishita e website: www.unep.org/events/un-day/Internacionaldayofzerowaste