DNM a inicia e preparacionan pa e proceso di RFQ baseline study di calidad di suelo

April 11, 2019

Den transcurso di siman pasa Departamento di Naturalesa y Medio Ambiente (DNM) a encabesa diferente reunion conhuntamente cu TAUW Consulting y ASDF (Americas Sustainable Development Foundation) pa delinea e rekisitonan pa un Request for Quotation (RFQ) for Soil Quality Baseline study na Aruba.

Riba 1 di april a bini hunto pa cera conoci cu e compania y tambe pa cera conoci cu diferente suelo na Aruba. A bishita diferente sitio unda cu lo bay haci investigacion di e calidad di suelo. Lo haci e investigacion na diferente sitio strategico riba Aruba p’asina por formula e base di e calidad di suelo cu ta existi na Aruba. Ta laga traha diferente mapa di e calidad di suelo y areanan cu tin sospecho cu por tin contaminacion.

Riba diamars 2 di april a reuni cu stakeholdersnan Departamento di Obra Publico (DOW), Departamento di Infrastructura y Planificacion (DIP), Departamento di Inspeccion Tecnico (DTI), Parke Nacional Arikok (PNA), Departamento di Agricultura, Cria y Pesca (Santa Rosa) y DNM pa haya nan pensamento ariba e proyecto aki. Asina por tin un bista mas amplio di kico mester bini den e documento RFQ, p’asina companianan por haci nan bid. E topiconan cu a bin dilanti ta si den pasado lo a dera tankinan cu lo por a conduci na posibel contaminacion di nos suelo. Tambe a bin dilanti cu ta haci falta di reglamento y control di entrada di productonan cu ta afecta nos calidad di suelo. DNM kier logra haya un standard baseline study di kico ta e norma di un calidad di suelo limpi/sano. A conclui cu lo haci boramento di entre 0 cu 50cm y di 50 cm pa 2 meter p’asina manda e muestranan aki pa laboratorio pa determina e calidad.

Diabierna 5 di april, DNM a compaña e representantenan di TAUW consulting na e diferente sitio cu posibelmente lo bay haci boramento. A logra haya algun sitio cu ya tawata coba unda e representantenan por a wak e profil di e suelo. Nan a keda impresiona cu diferente localidad y e calidad di suelo pero tambe asombra cu tin actividadnan humano unda cu ta forma contaminacion di suelo. DNM ta keda obhetivo cu e baseline study aki. DNM tambe ta convenci cu e resultado lo sirbi den futuro como e punto di sali contra cual lo por determina si un compania ta causa contaminacion di e suelo of no y haci nan responsabel pa corigi esaki. Asina por demanda nan entrega e suela bek manera nan a hay’e. Limpi y sano.

Scroll To Top
Departamento di Naturalesa y Medio Ambiente | © 2024