Importancia di Abehanan pa nos consecha di fruta y berdura

January 29, 2019

Tin diferente sorto di bestia cu ta poliniza matanan y flornan. Entre nan ta e parhanan, barbuletnan, ratonan di anochi y tambe abeha. Abeha ta esun di mas importante. E ta contribui cu 80% di produccion di nos cumindanan den un manera directo of indirecto.

Saliendo di e conocemento aki, Directie Natuur en Milieu (DNM) kier informa pueblo ariba e rol importante di abehanan y kico tur nos por haci pa preservacion.
Abehanan ta di sumo importancia y e ta e yabi pa naturalesa su existencia. Na gran parti di mundo abeha ta clasifica como e polinisador mas importante pa e matanan den naturalesa y pa un parti di cosechanan di nos fruta y berduranan.

En total tin casi 20,000 sorto di abeha y esun mas popular y conoci ta yama abeha di honing (honingbij). Ta cuida esakinan den casnan di abeha, esta un cashi traha pa hende. E abeha tin un rol indirecto cu ta contribui 30% den e cadena di produccion di cuminda pa hende. Por ehempel, bo por bisa cu si no tawata tin abeha e ora lo bo por ripara esaki den e seccion di berdura y fruta den bo supermercado. Pues, lo tin 30% menos disponibilidad.

Abeha no solamente tin e funcion di poliniza flornan, pero tambe e produccion di honing. Un abeha adulto ta tene su mes ocupa cu chupa nectar di flornan pa produccion di honing. Pero e pregunta ta keda dicon honing? Abehanan tin 4 necesidad pa sobrevivi y un di nan ta suficiente cuminda. P’esey nan ta traha honing. Asina p’e temporada di secura nan por tin suficiente cuminda. E 4 necesidadnan ta un clima apropia den e cas, suficiente cuminda, lugar adecua pa biba y dispone di materialnan adecua traha nan neishi.

Tin diferente factornan cu ta conduci na e reduccion di e cantidad di abehanan. Entre otro: bacterianan y parasitonan, uzo di quimiconan uza pa combati insectonan indesea pa hende, matanan cu a disparse y cu tin menos awendia door di rosamento. Pero mas tanto tin di haber cu un combinacion di e factornnan. P’esey lo ta deseabel pa nos tene cuenta cu e factornan menciona pa yuda e abahenan y proteha nan.

Na Aruba tin diferente hende ta cuida abehanan. E personan aki yama imker. Imker ta tene nan mes ocupa cu e produccion di honing di e abehanan y hopi biaha ta yama nan pa bin salba un cas cu a bira hogar di un cas di abeha. Tin programanan di preservacion manera “Adopt-a-beehive” di Cunucu Mondi Fierno na unda cu nan ta haci un yamada na famianan cu ta desea pone nan tereno disponibel pa realoca casnan di abeha ora ta necesario. Como recompensa bo ta bin na remarke pa haya parti di e produccion di honing. E organizacion tambe ta tuma donacion pa cu e causa bunita aki.

DNM kier gradici organisacionan cu tin programanan di incentivo manera esun aki. Asina nos por conserva locual ta importante pa nos naturalesa su sobrevivencia. A la vez ta haci un yamada na companianan encarga cu pesticida pa en vez di deshaci di casnan di abeha, haci un yamada pa resacata y realoca e casnan di abeha na un manera biologico y natural. Di e manera aki nos por tin un poblacion sano y suficiente pa produccion di fruta y berdura.
Potretnan ta cortesia di Stimaruba.

Remember: “You catch more bees with honey”

Scroll To Top
Departamento di Naturalesa y Medio Ambiente | © 2024