Presencia di un malesa mortal di bushi raporta pa Aruba

August 12, 2022

Varios sambuyado local a observa bushi (“Long-spined sea urchin”, Diadema antillarum) morto y muriendo den Aruba su awanan costal, locual ta rekeri e atencion y accion di nos comunidad.

Segun Tatiana Becker, MSc. ing. (ecologo marino), e observacionnan y potretnan comparti ta casi sin duda e malesa misterioso y fatal di bushi cu ta bezig ta plama rond di Caribe causando mortalidad extenso.

Ta asina, cu na cuminsamento di juli 2022, Tatiana Becker a haci un conteo di bushi.  Esaki a tuma luga prome cu e malesa misterioso matador di bushi. Asina Aruba por conta cu un “baseline” /referencia pa monitorea mortalidad y e recuperacion potencial di e bushinan.

E mortalidad halto ta afecta mas tanto e bushinan, cu ta un especie indicativo pa e salud di un ecosistema di coral. Door di nan importancia ecologico como herbivoro (comedo di alga), similar na e gutunan (“parrotfish”), e salud di e especie aki tin implicacionnan pa e sector turistico y pa piscadornan cu ta depende di nos ecosistema costal.

Locual a ripara na por lo menos dos sitio na Aruba ta, cu e bushi ta perde su tehido y spinanan. Nos ta referi na Tres trapi y Mangel Halto.

Tatiana: “Mi ta snorkel of sambuya na Tres Trapi casi tur siman y diripiente, di un siman pa otro, mi a bin di ripara cu un cantidad grandi di bushi tabata morto y otro muriendo. No ta ami so a wak esaki, sino otro sambuyadonan tambe a wak esaki den e siman di 25 pa 31 di juli. Mi a saca potret di e bushinan cu den algun dia tabata pasando den diferente estado:

  1. individualnan (bushi) saludabel pega na e superficie duru di piedra (imagen 1),
  2. individualnan cu a los, yegando den e areanan di santo, unda nan ta saca nan spinanan (imagen 2),
  3. individualnan cu mas y mas perdida di spinanan y tehidonan, unda e skelet ta bira visibel (imagen 3),
  4. finalmente nan ta muri, y e restonan ta desintegra mas ainda door di pisca y otro animalnan marino (imagen 4).”

Raporta door di Albi Valdéz, BSc (activista conservacion marino, Divemaster). Albi Valdéz a raporta su observacionnan riba e website di AGRRA, https://www.agrra.org/sea-urchin-die-off/. Mientras cu ta revisa e observacionnan, e potretnan y conteonan ta duna un indicacion cu e situacion pa Aruba su bushinan no ta mustra dje bon ey.

Ya caba a planea pa ripiti e conteo pa duna un idea di e porcentahe di mortalidad na Tres Trapi y Mangel Halto. Algo cu ta di sumo importancia ora di planea y maneha, y conserva nos bushi.

Di parti di Directie Natuur en Milieu(DNM) nos ta urgi tur sambuyado pa raporta nan observacionnan y manda potretnan di e bushinan pa nos via info@dnmaruba.org y tambe AGRRA (uzando e link ariba), cu ta yuda verifica su presencia y plamamento den nos costanan. Hasta ora no tin bushi morto of muriendo, e informacion por ta hopi valioso pa cientificonan y manehadonan di nos recursonan (DNM y FPNA). Tambe pa evita cu e malesa ta sigui plama, sambuyadonan mester percura pa haci nan wetsuits y ekipo di sambuya bon limpi cu awa dushi despues di cada sambuya y evita sambuya den un sitio unda tin indicacion di malesa (“sitio contamina”) pa un “sitio limpi”. Pa ultimo, mester evita pa mishi of move bushinan bibo, morto of muriendo.

DNM ta agradecido na Tatiana Becker y Albi Valdez pa nan aporte y observacion cu a wordo raporta. DNM cohuntamente cu FPNA- Parke Arikok a reuni tocante esaki y Prke lo hasi buseonan necesario na sitio cu ta Parke Marino.

imagen 1

imagen 1

imagen 2

imagen 2

imagen 3

imagen 3

imagen 4

imagen 4

Scroll To Top
Departamento di Naturalesa y Medio Ambiente | © 2022